Trabakua
Mendibil

Trabakuko Goitik ateratzen da. Lehen metroek behera egiten dute —kilometro bat baino gehixeago— ezkerreko bidegurutze batera arte, non asfaltoa atzean utzi eta aldapa bati ekiten zaion, tarte batez gogorra baina laburra. Goian, 2,5 kilometrotan dagoen bidegurutzean, Mendibil menditarako lehen seinaleak agertzen dira: harrizko pista nagusi bera da, aurrera jarraitzen duena Asuntza eta Urkorantz —horrekin Trabakua, Asuntza eta Urko zirkuitua ere egin daiteke—, eskuinera berriz Berano, Berano Txiki eta, urrutixeago, Ermuarantz jaisten da.

Pista nagusi horri jarraitzen zaio metro batzuk ezkerrera, haritz erraldoi batera arte, enborrean marka zuri-horiak dituena: han, zuhaitzaren atzean bertan, harrizko pista utzi eta lur-bide bati heltzen zaio. Bidea inoiz utzi gabe, lur-bide horrek gorenera eramaten gaitu, eukalipto talde baten artetik.

Eukaliptodian, ezkerreko bidezidor bati heltzen zaio, apur bat behera egiten duena, Mendibil aurrez aurre dugularik, larreen artean altxatzen den tontor txiki gisa. Aurrerago, burdinazko ate bat zeharkatzen da, eta bost minutu eskasera gailurra hartzen da (2,98 km · 616 m).

Goitik Oizerako eta Durangaldeko mendietarako ikuspegiak daude, Urkoraino, eta Markina aldera eta kostaldera ere bai —eguraldi onarekin itsasoa ere ikusten da. Itzulera bide beretik egiten da, nahiz eta gailurretik beste bi aukera ere dauden: hego-ekialdera, Arteta eta bere iturrira jaisten dena, Trabakua, Mendibil, Olamendi eta Arteta ibilbidekoa, edo ipar-ekialdera, mendia inguratuz, Trabakua eta Iturreta lotzen dituen pista beretik, Trabakua, Iturreta eta Iruzubieta ibilbidekoa, baina alderantziz.