Urko, Egoarbitza, Santamañazar
eta Zengotitagane

Urkoraino igoera (8. km · 785 m) Trabakuatik igotzen den Asuntza-Urko fitxako bide berbera da: hormigoizko eta harrizko pista. Gailurrera iritsita hasten da jaitsiera, Ermutik datorren azken zatiarekin bat eginez: lehenengo, bide estua; gero, errepide zati bat; eta ondoren, ezkutuan dagoen bidegurutze bat, lehen aldian topatzea kostatzen dena, Amañako auzora jaitsi arte (12. km · 171 m), Eibarren.

Amaña zeharkatuta, industrialdera igotzen da, eta handik hasten da Egoarbitzarako (16,2 km · 722 m) bidea: hasieran pista, gero gailur-lerro gogor eta tentea, eta amaieran harritza duen zatia, kontu handiz ibiltzea komeni dena. Igoera hau, Aixolako presarako jaitsierarekin batera, Zaldibarko Zaldutrail lasterketak ere partekatzen du.

Aixolako presara jaitsiera (19. km) oso ona da: lehenengo bide estua, gero pista. Presako bidera iritsi bezain pronto, ezkerretara metro gutxi batzuk egitea merezi du, urte osoan ura duen iturri batera. Presaren aurrealdea zeharkatu, eta Santamañazar aldera igotzen da (22,6 km · 663 m), dena pista, misteriorik gabe.

Handik Santa Marinara jaisten gara; han ermita dago eta ura berriz hartzeko aukera. Ermitan GRa hartzen da, poliki-poliki Arietxuraino igotzen dena (28,8 km · 483 m), Osmagain-Arietzu ibilbideko gailur berbera, baina beste aldetik iritsita.

Arietxutik krestan jarraitzen da erdi aldera arte, eta gero Zengotita auzora jaisten da, urte osoan ura duen iturri bat dagoen tokira. Iturriaren ondoren hasten da Zengotitaganerako igoera (32,5 km · 811 m): dena pista, etenik ia gabe, baina nahiko eramangarria. Eta handik, ia bertikalki Trabakuara: azken jaitsierak malda handia dauka, 400 m desnibel 2 km eskasetan, eta zirkuitua ixten da.