Trabakua, Aginaga, Ixua
Kalamua eta Barinagara jaitsiera

Ibilbide honek bi helburu ditu: Aginaga eta Ixua arteko bide zaharra nola dagoen ikustea, eta Barinagatik Trabakuara itzultzeko beste aukera bat bilatzea. Ixuarako bidea garai batean irekita egon zen, eta oraindik bizikletaz ibiltzeko moduan dagoen jakin nahi dugu.

Trabakuatik Ermuarantz irtengo gara. 1,5 km ingurura, Donagarai baserriaren ondoan, ezkerrera hartuko dugu Artetara igotzen den bidea.

Bidegurutzean berriro ezkerrera egingo dugu, eta harri-pistatik jarraituko dugu Asuntzaraino, 4,8 km-ra.

Asuntzara iritsi baino metro batzuk lehenago, ezkerretara lurrezko bide bat ateratzen da, maldan behera hasten dena. Bide horretatik Aginagako goiko aldera iritsiko gara, baserri-gune batera. Auzunea zeharkatuko dugu, eta irteeran iturri bat dago.

Hemen hasten da ikertzera etorri garen zatia: Ixuarako bidea.

Hasieran, dena ondo. Bidea irekita dago eta itxura ona du. Pixka bat jaitsi ondoren, aldapa gogor samar batekin egingo dugu topo; harri-plaka labain samarrak ditu, eta gora igo beharko dugu.

Aldapa gainditu ondoren, bidea ixten hasten da eta lehen arazoak agertzen dira. Hemendik motorrak pasatzen direla nabari da, gurpilek markatutako errei bat baitago, baina gainerakoa sasiz beteta dago.

Aurrera egin ahala, landarediak gero eta gehiago ixten du bidea, eta zati batzuetan hobe da bizikletatik jaitsi eta oinez jarraitzea. Horrela kilometro bat inguru. Azkenean bidea berriro zabaltzen da, gune garbi batera aterako gara eta arazorik gabe jarraituko dugu pedalez.

Ez nuke bide hau bizikletarako gomendatuko, baina beste aukerarik aurkitzen ez dugun bitartean, Ixuarekin lotzeko balio digu. Hori bai, sasiek doako akupuntura saio bat oparitu digute.

Ixuan, jatetxearen ondoan errepidera aterako gara eta Usartzarantz joango gara; han beste iturri bat dago.

Pixka bat aurrerago ezkerrera hartuko dugu, Kalamuarantz. Abereentzako ate metaliko bat pasatu ondoren, gailurrerako igoera hasten da.

Bidean beste bi iturri daude. Altuera irabazten jarraituko dugu Kalamuara iritsi arte, eta han ikuspegia alde guztietara zabaltzen da. Merezi du goian pixka bat gelditu eta paisaiaz gozatzea, jaitsierari ekin aurretik.

Gailurretik ipar-mendebalderantz joko dugu, bizkarrean behera, Barinagarantz. Jaitsiera luze eta polita dugu zain. Hasieran bizkarretik jarraituko dugu, eta erraz pasatzeko moduko pare bat ate metaliko igaroko ditugu.

Altuera galdu ahala, Markina eta Etxebarria ikusten dira, eta Oiz urrunean.

Etxarteko Santa Kruz ermitarantz jaisten jarraituko dugu, Barinagatik gertu. Ondotik pasatu eta Etxebarria eta Barinaga lotzen dituen errepide nagusira aterako gara.

Behean ezkerrera hartu eta Barinaga auzora sartuko gara, frontoiaren ondotik. Atzealdean beste iturri bat dago.

Barinagatik Iturretara igo eta ohiko bidetik itzul daiteke, beste batzuetan egin dugun bezala. Oraingoan, ordea, aldatu egingo dugu eta Aginagatik itzuliko gara Trabakuara.

Errepidetik jarraituko dugu Aginagarantz, ibaiaren ondotik, belardi, baserri eta abere artean. Asfaltoa izanda ere, oso gune polita da.

Errepide nagusitik Aginagarako bidegurutze seinaleztatura iritsiko gara. Han eskuinera hartu eta elizarantz igotzen hasiko gara. Elizaren ondotik pasatu eta gora jarraituko dugu Aginagako goiko aldera, hasieran zeharkatu ditugun baserrietatik gertu, baina haietara iritsi gabe.

Hemendik joaneko bide beretik itzuliko gara Trabakuara, berriro Asuntzatik pasatuz.